文章出自：Meow Me Diary
要將主子交俾陌生人照顧主人一定好唔放心，所以揀交俾邊個或者邊間貓酒店照顧就要做足功課，首先寵物酒店內環境、地點、照顧經驗及其他服務都一樣重要。
1.環境
主人無論係咩原因要將貓貓寄養，環境都會係首要嘅考慮因素，無人會想貓貓住喺啲又細又唔乾淨嘅地方，所以當然選擇由漁護署正式發牌的酒店最為合適。同埋建議主人做決定前真係花啲時間去你心儀或有興趣嘅貓酒店參觀咗先，我哋遇過啲客人無預先參觀過環境就預訂咗，結果貓酒店環境未如主人心中所想, 最受委屈嘅係貓貓呀！
2.地點
貓酒店嘅地點一嚟要方便到主人，二嚟都要方便埋主人嘅朋友。貓貓除咗係主人嘅心愛主子之外，相信都已經俘虜埋主人身邊嘅朋友。主人身在外地，如果佢嘅朋友可以代為探訪貓貓的話，主人會安心好多。甚至乎貓貓突然有咩事，主人都可以拜托朋友幫手睇吓貓貓情況，有需要時可盡快帶到獸醫診所。
3.照顧經驗
搵人幫手照顧貓貓仲有一個好重要嘅考慮因素：就係酒店內照顧者嘅經驗。有無湊過幼貓／患病嘅貓貓／需要餵藥／打皮下水經驗？長遠嚟講主人都需要考慮埋。搵到一間有以上經驗嘅貓酒店，可以免去你好多憂慮。另外店家細心程度都好重要，我哋試過照顧貓貓期間留意到貓貓有異樣，建議主人回港後帶貓貓做全面檢查，結果最後發現原來有初期心臟病。所以搵到一間會認真照顧同細心觀察貓貓嘅店家都好重要。
4.其他服務
好似第2點提到如果貓貓有咩事的話，貓酒店會唔會幫手帶去睇醫生？
因為有啲真係未必會，又或者會收一個好唔合理嘅價錢。睇完醫生可能需要餵藥，店家會唔會幫手餵藥呢？又或者寄宿期間，主人要求店家帶貓貓去某啲地方，例如係帶貓貓去俾主人嘅屋企人見下貓貓，店家會唔會都肯幫手？有時航班延誤／收工夜咗，貓酒店職員會唔會肯等埋你同貓貓先收工？呢啲都係需要考慮嘅範圍之內。
